Mar 3 | KYG | STEP | Yesu'a halate Yu vaya'ai mono nopi'mo haino mai'nigeno aya'mo kalage ki'niya vekamo ani mono nopi'mo mai'niye.

Mark 3

Aya'mo kalage ki'niya vekamo ava gemae.

(Mt 12:9-14; Lu 6:6-11)

1 Yesu'a halate Yu vaya'ai mono nopi'mo haino mai'nigeno aya'mo kalage ki'niya vekamo ani mono nopi'mo mai'niye. 2 Mago vaya'amogimo agoti hu'a atesayafe'mo age'a mai'ne'apae'mo, Sapati afina'mo alino alagepa huno atesifigeta agegaune, hu'a hu'nae. 3 Yesu'a aya'mo kalage ki'niya vekae'mo, he tika male eno, huno ha paiteno'ae'mo 4 apakaefe'mo, Sapati afina'mo ke'aepa gemo akame hisunafe'mo na agufa kava'mo hugune. Sapati afina'mo alagepa kava'mo hisupi hosu kava'mo hugune. Vaya'mo hapaesupi hapa maegaune, huno apafi ge'nige'apae'mo ge osu'a afa'a mai'nae. 5 Yesu'a aulu hapaeno apakelinuneno huteno aipamo leno apate'niye. Lokiya apaipa vaya'mo mai'naya'mofe'mo aipamo'mo kana hu'niye. Agaemo, kaya'mo aeka hayo huvo, huno hu'nigeno aya'mo aeno hayo nehigeno'ae'mo aeno api ai'nigeno afa'a hane'niya ayakana huno hane'niye. 6 Falasi mono vaya'mogi ani kava'mo agete'apae'mo mono nopati'mo emi e'a malage hu'a Heloti'a akame hu'naya vaya'e'mo ali'a anupa hu'a mai'ne'a Yesu'a haesayafe'mo ge huge afige hu'a mai'nae.

Muki vaya'mo ani kotute'mo ali'a anupa hu'a mai'naya gemae.

(Lu 6:17-19)

7 Yesu'e ge'amo ne'afiya vaya'e'mo apatale'a Galeliya kotega ani kotutegamo ne'vage'apae'mo Galeliya kotegati'mo asole vaya'mo apakame hu'a u'nae. Asole vaya'mogimo hu'niya kavafe'mo ava gemo afite'apae'mo Yutiya kotegati ege Yulusalemu taonifati'mo ege Itomiya haopaleti'mo ege Yoneni ani faliga kotegati'mo ege Taiya taoni haopalegati'mo ege Saitoni taoni haopalegati'mo ege hu'a Yesutegamo e'nae. 9 Hogoteno asole vaya'mo ago alino alagepa huno apate'niya'mofe'mo kaita hapau'niya vaya'mo e'a agufale'mo ame alisayafe'mo e'a fai'a kili paete'a male'a apali'nae. Male'a apali'naya'mofe'mo ge'amo ne'afiya vaya'aife'mo, male'a o'napalisayafe'mo mago aise sipimo alitapa alo hutapa nateyo, huno hapa pai'niye. 11 Hosu apaune vaya'mogimo agete'apae'mo asagau'a aite'a alopa gefati'mo ge hu'apae'mo, Goti mafa'ne'amo mai'nane, hu'a ha pai'nae. 12 Yesu'a hosu apaune vaya'aife'mo lokiya gemo huno hapa pai'niye. Ina la'namo mai'nofi hutapa hapa opaiyo.

Yesu'a apa vaya'amo lekana paino apate'niya gemae.

(Mt 10:1-4; Lu 6:12-16)

13 Yesu'a aise avele'mo haino mai'neno'ae'mo hau'niya vaya'aife'mo ge hu'nige'a agaetegamo e'nae. 14 Agaemo tuolofu'a vaya'mo agae'e'mo magokepi lokae'a maige alino apatesige'a u'a Goti ge'amo ae'a hakalo hu'a hapa paige kaita hapau'nisiya vaya'aina ali'a hapage'a apatege himamu'aleti'mo hosu apaune vaya'aina ali'a hapa fai'a apatalege hisayafe'mo lekana paino apate'niye. 16 Lekana paino apate'niya vaya'ai apaki'apimo hane'niye. Yesu'a Saimonife'mo Pita'ae huno agi ate'niya vekagi 17 Sepeti mafa'nela'mo Yemisi'e agana'amo'mo Yoni'efe'mo Yesu'a Mo'anasisi vekalane huno anaki anate'niya anakimo aepa'amo hakalu nehiya agufa kava'mo huno lokiya vekalanagi 18 E'nalu'agi Filipi'agi Matolomiyu'agi Matiyu'agi Tomasi'agi Afiyasi mafa'nemo Yemisi'agi Ta'niyasi'agi Saimoni Seloti'agi Yutasi Isakaliyoti'a Yesu kutulu ya'mo ali'niya vekagi hu'a mai'nae.

Satani'mo Yesu aipafi'mo mai'niye hu'a hu'naya gemae.

(Mt 12:24-32; Lu 11:14-23; 12:l0)

20 Yesu'a halate no'alega uno mai'nige'apae'mo asole vaya'mo e'a ali'a anupa hu'a mai'nageno'ae'mo Yesu'e ge'amo ne'afiya vaya'e'mo ne'ya'mo nesaya kana'apimo ohane'niye. 21 Yesu vaya'amogimo ani kavafe'mo ava gemo afite'apae'mo, negi kava'mo nehiye, hu'a hute'a avalesayafe'mo u'nae. 22 Ke'aepa gemo ali'a apaya ne'malaya vaya'mo Yulusalemu taonifati'mo e'apae'mo, Mielisemuli'a aipafi'mo mai'niye. Hosu apaune vaya'aite'mo yagaino ne'apateya vekamo himamu'aleti'mo hosu apaune vaya'mo vaya'ai apaipafati'mo alino hapafaino ne'apatale, hu'a hu'nae. 23 Yesu'a, eyo, huno ge hu'nige'a e'nageno'ae'mo aeno kalafefa gemo huno hapa paino'ae'mo, haiya kava huno Satani'a agai'amo afa'a alino ha faino atalegaiye. 24 Magoke vayapati'mo ali'a fako hute'a apakai'apimo hapae'a hano hu'a apatalegae. 25 Ani kava'mo hu'a magoke afamo anaga'mogimo ali'a fako hu'a kaveta hisayana magokepi alagepa hu'a lokae'a o'maigae. 26 Ani kava huno Satani'a yagaino ne'apateya vaya'alegamo kame huno apatesiyana muki vaya'aite'mo yagaino ne'apateya himamu'amo hano hugiye. 27 No aepa vekamo lokiya vekamo mai'nisiyana mago vekamo'a eno atafauno nofi kino o'ate'nisiyana no'afati'mo muki kagemi ya'amo afa'a haino o'aligiye. Hogoteno no aepa vekamo atafauno nofi kino ate'nisiya'mo'mo afa'a haino no'afati'mo muki ya'amo aligiye. 28 Lama gemo lapa nepauve, huno, Goti'a muki hosu kava'apigi agaefe'mo hu'a faipa hu'a ne'ataya ge'apimogi huno afa'a alino atalegaiye. 29 Alino atalegaiya'monanafa aote Auneme'ae'mo hu'a faipa hu'a ne'atesaya vaya'ai hosu kava'apimo alagi alino o'atalesigeno hu'a faipa hu'a ne'ataya gemo anona'apimo afa'a hanege hanege huno hanegaiye, huno hapa pai'niye. 30 Apakaemo Yesufe'mo hosu aune vekamo aipafi'mo mai'niye, hu'a hu'naya'mofe'mo ani gemo hapa pai'niye.

Yesu ita'amo'e agana'amogi'efe'mo apava gemae.

(Mt 12:46-50; Lu 8:19-21)

31 Ani afina'mo Yesu ita'amo'e agana'amogi'e'mo e'a kumategamo he ti'a mai'ne'apae'mo mago vekamo ali'a ate'nageno nopi'mo hai'niye. 32 Asole vaya'mogimo fai'a ku ai'a ate'a mai'ne'apae'mo, itakamo'e kaganakamogi'e'mo kagaemo kagesayafe'mo e'a kumatega mai'nae, hu'a ha pai'nageno'ae'mo, 33 ita'nimo'e nagana'nimogi'e'mo haiyate e'a mai'nae, huno huteno aulu hapaelinuneno huno ne'apakeno'ae'mo, ita'nimogi'e nagana'nimogi'e'mo manifi'mo mai'nae. 35 Goti'a hau'niya kava'age'mo nehaya vaya'mo nagana'nimogi maige nasa'nimogi maige ita'nimogimo maige hu'a mai'nae, huno hapa pai'niye.